O actor, cantante e creador galego Nelson Quinteiro continúa a expandir o seu universo artístico no ámbito familiar e educativo cun novo catálogo de propostas escénicas e musicais de creación propia.

A través de espectáculos como Barullo!,  Pequeno Cabaret Infantil, As Nosas Músicas D´Aquí e de obradoiros participativos centrados na música, o movemento e a expresión, Quinteiro reforza a súa traxectoria como artista integral e referente da escena infantil galega, cunha aposta por experiencias cheas de humor, emoción e valor pedagóxico que convidan a soñar, cantar e xogar en familia.

Entre os puntos fortes que definen o traballo de Nelson Quinteiro destaca, en primeiro lugar, a súa extraordinaria capacidade de caracterización, que lle permite dar vida a personaxes únicos, expresivos e recoñecibles tanto no ámbito teatral como musical. A isto súmase unha sólida infraestrutura profesional, que lle permite ofrecer propostas versátiles e adaptadas a diferentes formatos e públicos, cunha produción técnica e artística de alto nivel.

A súa ampla bagaxe escénica e musical, compleméntase coa súa capacidade multiinstrumental, que o leva a empregar con naturalidade instrumentos como a guitarra, o ukelele, a percusión, a gaita ou a voz como ferramentas expresivas ao servizo da escena. Ademais, Quinteiro posúe unha notable habilidade para crear contidos orixinais en espazos diversos, dende o teatro de rúa e as intervencións urbanas ata o teatro escolar, os centros culturais ou as accións en espazos non convencionais, sempre coa premisa de conectar co público e facer da cultura unha experiencia viva, próxima e participativa.